شعر خالوک جان
خالوک جان - قطعه ای جالب از سروده های استاد فرهود جلالی
بوردمه قبرستون سر
قدیم مردوم وَر
هنیشتمه سنگ سر
شه دلّه هدامه پر
خالوک مره یاد بمو
ونه گوک داد اٍمو
خالوک سر دَوَس بَه
مار و خواخر و کس بَه
صدا زویی آی خالوک
گته چیه جانه گوک؟
داد بزومه خاله ره
پار پیرار محله ره
سرهدامه آواز ره
صَّنق دل راز ره
خاله پرس بهاره
محله ته انتظاره
ککی ته بیقراره
خاله نوروز خون بِمو
و شاد و خنون بّمو
باد بهارون بّمو
نوروز سلطون بِمو
گل به گلستون بِمو
بلبل به بوستون بِمو
------------------------------
کو عید و نوروزخون؟
چاوش خون حاجیون
کوئه محل تعزیه خون؟
تکیه سر دائه اَذون
کو عمه خانم تنیر؟
لاک و لاک وچه و خمیر
کو گرم نون بِ
کجه بورده تنیر دی؟
وقتی تنیر دی بورده !
محله سر روزی بورده!
------------------------------
هلی تتی نکنه
میچکا کلی نکنه
اذّار و اَل غم بَزه
فِک همه ماتم بَزه
باغ همه بی عطر و بو
دل همه سنگ و کهو
گت کچیکی بورده یاد
احترام ره کاش بیارد
نا جِت کَته نا اذّال
نا کوره تش نا ذغال
جنگل بی چلچلا
پاپلی نکنه سما
محله بی کدخدا
نه ساز دانَّه نه سما
